रुकुमकोट देउराली गुफासम्मको यात्रा---कुमार गागे मगर

#घुमन्ते मिति::२०७५/१२/२३ शनिबार

Kumar Gage Roka Magar

बाउन्न पोखरी त्रिपन्न टाकुरीका नामले परिचित जिल्ला रुकुम पूर्व, रुकुमकोटको बसाइमा करिब १३ वटा महिनाहरु व्यतित भइसक्दा पनि रुकुमकोट देखि करिब तीन/चार किलोमिटरको दूरीमा रहेको पर्यटकीय स्थल देउराली गुफा पुग्न सकिएको थिएन । केही महिना पहिले देखि दुइचार जना सरहरुसँग घुम्न जाने कुरा त चलिरहे पनि विविध कारणवश जान सकिरहेका थिएनौँ । एक साँझ अफिसबाट बाहिर निस्कने क्रममा विर सरले "भोलि फुर्सद हुन्छ भने देउराली गुफा घुम्न जाँऊ न" भनि प्रस्ताव राख्नुभयो । "हुन्छ जाऊँ न त" भन्ने मेरो जवाफ थियो । "तर, घुम्ने समय चाँहि विहानै उचित होला, किनभने आजभोलि दिनको समयमा घर्मी, हावाहुरी अनि मध्यपहाड लोकमार्गको धुलोले हैरान पार्छ ।" मेरो सल्लाह थियो विर सर अनि हरी सरलाई । अब केही घण्टाको घुमन्ते टोली तीनजनाको हुने पक्का भयो, शनिबार बिहान सात बजेतिर जाने समयसीमा तय भयो ।

देउराली गुफा रुकुमकोट

देउराली गुफा रुकुमकोट

शनिबार बिहान केही अल्छी पारामा निद खुल्यो विहानको सबै दैनिक कार्यक्रम टुङ्ग्याउँदा सम्म घडीको सुइँले साढे सात कताइसकेको थियो । कमलताल नजिकै कमलदह होटेलमा खाजा खाएर जाने सल्लाह भयो । अरुलाई सोधपुच्छ गरेको जानकारीलाई आधार मानेर स्पष्टको पथप्रर्दशक चिन्हहरु व्यवस्था नगरिएको हुँदा अल्मलिदै करिब ४५ मिनेटको पैदलयात्रा पश्चात हामी रुमगाड(लुकुमगाड) खोलाको तिरैमा रहेको पर्यटकीयस्थल देउराली गुफा पुग्यौँ । रुमगाड खोला केही मिटरको दुरीमा सुसाउँदै थियो । चरा चुरुङ्गीको आवाजले वातारण बेग्लै आनन्दप्रद थियो ।  अब हाम्रो कौतुहलताको घडी सकिएको थियो, बाँकी थियो भने त्यो थियो---अब प्रत्यक्ष दृश्यलोवकन गर्न मात्र ।

 

देउराली गुफा रुकुमकोट

देउराली गुफा रुकुमकोट

देउराली गुफा रुकुमकोट

जब गुफाभित्र प्रवेश गर्यौ, तब हामी अचम्मित र मोहित थियौँ । गुफाभित्र विचित्र आकृतिहरु चुनढुङ्गामा प्राकृतिक रुपमै पोर्ट्रेट/चित्राङ्कित रहेछन् । अजीव र विभिन्न खण्डहरुमा विभाजित गुफाको आकृति देखेर हामी चकित भयौँ । गुफामा चमेरा पाइन्छ भन्ने सुनेको र पढेका थियौँ, तर हामीले देखेनौँ । सायद मौसम अनुसार कतै बसाइँ सरेको हुनुपर्छ । गुफा भित्र कतै तपतप त कतै झरी नै पानी चुहिरहेको थियो । गुफाको अधिकांश भागमा घुँडासम्म डुबाउन पानीको पोखरीहरु रहेछन् ।

हामी गुफाभित्र सेलफोनको टर्चलाइटले बाटो पहिल्याउने काम गर्यौँ, कतै-कतै पानीको धाराले सेलफोन बचाउन हम्य-हम्य परेको थियो । हामी गुफाभित्र करिब एक घण्टाभन्दा बढी बितायौँ । गुफाको अवलोकन सकेर हामी केहीबेर सुस्तायौँ । अनि रुकुमकोटतर्फको बाटो ततायौँ ।

गुफाभित्र रहेका धेरै जसो आकृतिहरु तोडफोड भएको पनि देखिन्छ । शनिवार विदाको दिनमा पनि मान्छेहरुको आवतजावत थिएन । यसबाट सजिलै के अनुमान लाउन सकिन्छ भने आन्तरिक पर्यटनको प्रचुर सम्भावना बोकेको देउराली गुफा संरक्षण र प्रचारप्रचारको अभाव परेको देखिन्छ । केही संरक्षण र सम्वर्द्धनको प्रयास भएको त देखिन्छ तर त्यतिले मात्र प्रभावकारी व्यवस्थापन र पव्लिसिटीमा नपुग देखिन्छ । गुफामा चैतेदशैँ र नयाँ वर्षको दिनमा मेला लाग्ने गरेको विभिन्न स्रोतहरुमा उल्लेखित पाइन्छ।

देउराली गुफा रुकुमकोट #कुमार-गागे-मगर

देउराली गुफा रुकुमकोट #कुमार-गागे-मगर

देउराली गुफा रुकुमकोट #कुमार-गागे-मगर

Right-Side::> Hari sir, Rear-Side::> Bir Sir

Right-Side::> Bir sir,Mid::> Hari Sir

भिडियो हेर्नुहोस् ::>>